ಪುಸ್ತಕದ ವಿವರ

ಸಂ: ಪಾರ್ವತೀಶ ಬಿಳಿದಾಳೆ

ಕಲ್ಲೆ ಶಿವೋತ್ತಮ ರಾವ್ ಅವರು ಕನ್ನಡ ಪತ್ರಿಕೋದ್ಯಮದ ಹಿರಿಯರಲ್ಲಿ ಪ್ರಮುಖರು, ಹುಟ್ಟಿದ್ದು ಕಾರ್ಕಳ ಬಳಿಯ ಕಲ್ಯ ಗ್ರಾಮದಲ್ಲಿ, ಅದೇ ನಂತರ ಕಲ್ಲೆ ಆಗಿ ಅವರ ಹೆಸರಿನೊಂದಿಗೆ ಸೇರಿತು. ತಂದೆ ನಾರಾಯಣ ಕಲ್ಲೆ ಹಾಗೂ ಅವರ ತಂದೆ ಮೂಡ್ಲಿ ಮಂಜಪ್ಪನವರೂ ಸಹ ಕನ್ನಡ, ಇಂಗ್ಲಿಷ್ ಎರಡೂ ಭಾಷೆಗಳಲ್ಲಿ ಬರೆದ ಪತ್ರಕರ್ತರು ಹಾಗೂ ಬರಹಗಾರರಾಗಿದ್ದರು. ಇಪ್ಪತ್ತನೇ ಶತಮಾನದ ಮೊದಲಾರ್ಧದ ವಿದ್ಯಮಾನ ಅದು.

1930ರಲ್ಲಿ (29-08-1930) ಜನಿಸಿದ ಕಲ್ಲೆ ಶಿವೋತ್ತಮರಿಗೆ ತಮ್ಮ ಹದಿವಯಸ್ಸಿನಲ್ಲೇ ಓದಿನ ಗೀಳು. ಅದರಿಂದಾಗಿ ಬರೆಯುವ ಕಲೆ ರೂಢಿಸಿಕೊಂಡರು. ಅವರು ಬಹುಶಃ ಕಳೆದೊಂದು ದಶಕದಿಂದ ಮಾತ್ರ ಬರವಣಿಗೆ ಮಾಡಿಲ್ಲ. ಆದರೆ ಪುಸ್ತಕ ಪ್ರೀತಿ ಮುಂದುವರೆದಿದೆ. ಕಳೆದ ಏಳು ದಶಕಗಳಿಂದ ಅವರು ಬರೆಯುತ್ತಾ ಬಂದಿದ್ದಾರೆ. ಕನ್ನಡದ ಜನಪ್ರಿಯ ಟ್ಯಾಬ್ಲಾಯಿಡ್ ವಾರಪತ್ರಿಕೆಯಾಗಿದ್ದ 'ಜನಪ್ರಗತಿ'ಯೊಂದಿಗೆ 1960 ರಿಂದ 1990ರ ದಶಕದವರೆಗೂ ಸಂಪಾದಕರಾಗಿ ಹಾಗೂ ಕೊನೆಗೆ ಪತ್ರಿಕೆಯ ಮಾಲೀಕರೂ ಆಗಿ ನಡೆದು ಬಂದರು.